Jizzax davlat pedagogika universitetida “Besh tashabbus olimpiadasi”ning universitet bosqichi doirasida mini futbol bo‘yicha bellashuvlar yakunlandi. Bugun kun davomida musobaqalar kutilmagan gollar, hayajonli lahzalar va shijoat bilan yodda qoldi.
Bellashuvlarda jami 9 ta fakultet jamoasi ishtirok etdi. Ko‘pchilikni hayratga solgan kuchli o‘yinlar natijasida Jismoniy tarbiya va sport fakulteti, Fizika va texnologik ta’lim fakulteti hamda Tibbiyot fakulteti finalga yo‘l oldilar.
Final bahslari tom ma’noda “futbol bayrami”ga aylandi. Qat’iyat, jamoaviy o‘yin va g‘alaba uchun intilish, barchasi bir vaqtda maydonda namoyon bo‘ldi. Qizg‘in va shiddatli o‘tgan bellashuvlarda: 🥇 1-o‘rin — Jismoniy tarbiya va sport fakulteti jamoasiga, 🥈 2-o‘rin — Fizika va texnologik ta’lim fakulteti jamoasiga, 🥉 3-o‘rin — Tibbiyot fakulteti jamoasiga nasib etdi.
O‘yinni kuzatib borgan hakamlar hay’ati va tomoshabinlar har bir zarba, har bir goldan zavq olishdi. Universitet stadionidagi muhit haqiqiy futbol zavqini berdi.
Musobaqa yakunlangach, taqdirlash marosimida universitet rahbariyati ishtirok etdi. G‘olib jamoaga universitet rektori professor Maqsudjon Yuldashev faxriy yorliq hamda rag‘batlantiruvchi pul mukofotini topshirdi. Shuningdek, 2- va 3-o‘rin sohiblari ham faxriy yorliqlar va pul mukofotlari bilan taqdirlandilar.
Bu musobaqa nafaqat sport mahoratini, balki yoshlarning jamoaviy hamjihatligini, intizom va irodasini ham namoyon etdi. “Besh tashabbus olimpiadasi” universitet talabalari orasida sog‘lom raqobat va do‘stlik ruhini yanada mustahkamlamoqda.
