Avvalo, sizlarni yirik sport harakati — “Yangi O‘zbekiston talabalar olimpiadasi”ning boshlanishi bilan samimiy tabriklayman.

Mamlakatimizda sportga qaratilayotgan yuksak e’tibor, xususan, Prezident Shavkat Mirziyoyev raisligida o‘tkazilgan videoselektorda belgilangan vazifalar bu yo‘nalishning dolzarbligini yana bir bor ko‘rsatdi. Shuningdek, aprel–may oylarining “Sport va sog‘lomlashtirish oyligi” deb e’lon qilinishi sizlar uchun keng imkoniyatlar yaratmoqda.

Universitetimizda sport infratuzilmasini rivojlantirish va talabalarni ommaviy sportga jalb etish ustuvor yo‘nalishdir. Voleybol, basketbol jamoalarimiz hamda bokschilarimizning yutuqlari, “Talabalar ligasi” musobaqalari amalga oshirilayotgan ishlar samarasidir. Shu bilan birga, har bir talaba muntazam sport bilan shug‘ullanishi bugungi kun talabidir.

Aziz yoshlar! Sizlar ertangi kun pedagoglarisiz. Shu bois siz nafaqat bilimli, balki sog‘lom, irodali va yetuk shaxs bo‘lishingiz zarur. Sport sizda intizom, sabr-toqat, jamoaviylik va yetakchilik fazilatlarini shakllantiradi.

Sizlarni “Sport va sog‘lomlashtirish oyligi” hamda talabalar olimpiadasi doirasidagi musobaqalarda faol ishtirok etishga chorlayman. Har bir yutug‘ingiz universitetimiz nufuzini yuksaltiradi.

Hurmatli professor-o‘qituvchilar va xodimlar! Universitetimizda yaratilgan zamonaviy sport infratuzilmasi va barcha zarur sharoitlardan unumli foydalangan holda, sizlarni ham muntazam jismoniy faollik bilan shug‘ullanishga, sog‘lom turmush tarziga qat’iy rioya etishga chorlaymiz.

Barchangizga mustahkam sog‘lik va yorqin g‘alabalar tilayman!

Hurmat bilan,
Jizzax davlat pedagogika universiteti rektori, professor Yuldashev Maksudjan Abdullayevich.