Tashkil topishi

Fizika va uni o‘qitish metodikasi kafedrasi 1981-yilda tashkil etilgan. Ilk rahbarlikni 1981–1992-yillarda fizika-matematika fanlari nomzodi, dotsent Boymurod Sultonov olib borgan. Kafedra tashkil etilgan paytdan boshlab, fizika ta’limini zamonaviy metodlar bilan rivojlantirish va pedagog kadrlar tayyorlash asosiy maqsad qilib qo‘yilgan.
 

Rivojlanish bosqichlari

1992–1994-yillarda dotsent Mamajon Zokirov rahbarlik qilgan bo‘lsa, 1994–2006-yillarda dotsent Jahongir Rasulov kafedrani boshqardi. 2006–2014-yillarda dotsent Shermuhammad Doniyorov, 2014–2016-yillarda professor Rahmatulla Bekmirzayev, 2016–2017-yillarda dotsent Ismoil Mo‘minov, 2018–2022-yillarda yana professor Rahmatulla Bekmirzayev mudirlik qilgan. 2022-yildan hozirgi kungacha dotsent Sa’dulla Ubaydullayev kafedraga rahbarlik qilmoqda. Bu davr mobaynida kafedra tarkibida ilmiy darajali mutaxassislar soni ortdi, zamonaviy o‘quv-uslubiy majmualar yaratildi va xalqaro hamkorlik yo‘lga qo‘yildi.
 

Bugungi faoliyati

Kafedrada hozirda 26 nafar professor-o‘qituvchi ishlamoqda, shundan 7 nafari fan nomzodi, 4 nafari dotsent. Ta’lim jarayonida “Fizika va astronomiya” bakalavriat yo‘nalishi hamda “Aniq va tabiiy fanlarni o‘qitish metodikasi (Fizika va astronomiya)” magistratura mutaxassisligi bo‘yicha darslar olib boriladi. Kafedra a’zolari 1981–2022-yillar davomida 8 ta darslik, 9 ta o‘quv qo‘llanma, 10 dan ortiq monografiya va 1300 ga yaqin ilmiy maqolalar chop etgan. Xorijiy hamkorlik doirasida Boshqirdiston davlat universiteti va Rossiya Federatsiyasi Dubna shahri Birlashgan Yadro tadqiqotlari markazi bilan ilmiy loyihalar amalga oshirilmoqda.