Jizzax davlat pedagogika universiteti delegatsiyasi tomonidan Katmandu Universitetida O‘zbek madaniyati bilan bog‘liq ko‘rgazma tashkil etildi.

Ko‘rgazmaga kelgan ishtirokchilarga yurtimizda so‘nggi yillarda amalga oshirilayotgan islohotlar, hayotning turli sohalarini qamrab olgan muhim o‘zgarishlar xususida ma’lumotlar berildi. Shuningdek, qadimiy shaharlarimizning tarixiy va madaniy yodgorliklari, sayyohlar uchun yaratilgan shart-sharoitlar haqida so‘z yuritildi.

E’tiborli jihati, mezbonlar o‘zbek hunarmandlarining kulolchilik, so‘zana va kashta va do‘ppi tikish san’atini o‘z ichiga olgan milliy mahsulotlar ko‘rgazmasiga katta qiziqish bildirdi. Madaniy anjumanda yig‘ilganlar nafaqat san’at namunalaridan, balki o‘zbek oshxonasi ta’mlari, shuningdek, an’anaviy ashula va raqslardan ham bahramand bo‘lishdi.  Tadbirga kelganlarga milliyligimizni aks ettiruvchi sovg‘alar taqdim etildi.

Ta’kidlash joiz, delegatsiyamiz tomonidan tashkil etilgan Milliy ko‘rgazma Jizzax davlat pedagogika universiteti va Katmandu Universiteti o‘rtasida madaniy almashuv va aloqalarni yanada mustahkamlanishiga xizmat qiladi.