Jizzax davlat pedagogika universitetida “Ogohlik va mas’uliyat – barqarorlik asosi” mavzusida ma’naviy-ma’rifiy hamda profilaktik tadbir tashkil etildi. Unda universitet rahbariyati, viloyat ichki ishlar organlari vakillari, dekan o‘rinbosarlari, tyutorlar hamda 500 nafardan ortiq talaba-yoshlar ishtirok etdi. Tadbirda jamiyatda tinchlik va barqarorlikni ta’minlashda har bir fuqaroning ogohligi, mas’uliyati va huquqiy madaniyati muhim omil ekani ta’kidlandi.

So‘zga chiqqanlar bugungi globallashuv sharoitida axborot xavfsizligi, yot g‘oyalar va dezinformatsiyaga qarshi kurashish, shuningdek, giyohvandlik va turli jinoyatlarning oldini olish dolzarb vazifa ekanini qayd etdilar. Xususan, Prezidentning PF-207-son Farmoni asosida yoshlarni zararli illatlardan himoya qilish, ularning mafkuraviy immunitetini mustahkamlashga qaratilgan chora-tadbirlar izchil amalga oshirilayotgani ta’kidlandi.

Tadbir davomida talabalar o‘rtasida sog‘lom ijtimoiy-ma’naviy muhitni shakllantirish, profilaktik ishlarni tizimli yo‘lga qo‘yish, zamonaviy axborot tahdidlariga qarshi kurashishda innovatsion yondashuvlarni keng joriy etish yuzasidan qator takliflar ilgari surildi. Mutasaddilar tomonidan yoshlarni ogohlikka chaqirish, har qanday shubhali holatlarga befarq bo‘lmaslik hamda huquqni muhofaza qiluvchi organlar bilan hamkorlikni kuchaytirish muhimligi alohida ta’kidlandi.