“Biz bir bo‘lsak – yagona xalqmiz, birlashsak – vatanmiz!” g‘oyasi asosidagi “Ma’naviyat marafoni” loyihasi doirasida Jizzax davlat pedagogika universitetida talabalar o‘rtasida seminar tashkil qilindi. Seminarni Yoshlar masalalari va ma’naviy-ma’rifiy ishlar bo‘yicha birinchi prorektor S.Nazarqosimov ochib berdi. Seminarda so‘zga chiqqanlar mazkur loyiha doirasida viloyat miqyosida 11 ta aksiya, ko‘rgazmali tanlovlar, kitob yarmarkalari, badiiy-adabiy kechalar, sport musobaqalari hamda konsert dasturlari o‘tkazilishi nazarda tutilganligini, ushbu loyihaning asosiy maqsadi bugungi globallashuv davrida yoshlarning ta’lim-tarbiyasini tizimli yo‘lga qo‘yishga yo‘naltirilgan madaniy hordiq dasturlarini joriy etish orqali bolalar va yoshlar tarbiyasiga salbiy ta’sir etuvchi g‘oyaviy tahdidlarga qarshi ularning immunitetini shakllantirish hamda kuchaytirishga, bo‘sh vaqtlarini mazmunli tashkil etish zamirida yoshlarni ilm-fanga, ma’rifatga qiziqtirishga qaratilganligini  alohida ta’kidlab o‘tishdi.

Seminarning asosiy qismida universitet psixologi B.Bosimov tomonidan talabalar o‘rtasida “Baxtli bo‘lish o‘z qo‘limizda” mavzusida qiziqarli mashg‘ulotlar tashkil etildi. Mashg‘ulot davomida ishtirokchi “Baxt aslida nima?” savol bo‘yicha o‘z fikr-mulohazalarini bildirishdi. Psixolog tomonidan berilgan maslahatlar va baxtga erishilish yo‘llari haqidagi qiziqarli  ko‘rsatmalar  asosida bo‘lib o‘tgan seminar trening talaba yoshlarda chuqur taassurot qoldirdi.