Navro‘z milliy ma’naviyatimiz rivojidagi eng muhim shodiyonadir. Bu kunda yurtimizning har bir go‘shasida bahoriy taomlar-u, turli milliy o‘yinlarga alohida urg‘u beriladi. Xususan, milliy taomlarimizdan sumalak, halim, ko‘ksomsa, ko‘k chuchvara kabilar bayram dasturxonining ko‘rkiga aylanadi. Ayniqsa, sumalak bazmlarining o‘zgacha gashti bor.

Jizzax davlat pedagogika universitetining hovlisidan yangragan kuy-qo‘shiqlar, milliy termalar sadosi yaqin atrofga taraldi. Doshqozon atrofiga jamlangan professor-o‘qituvchilar va talaba yoshlarni ko‘rgan kishining ko‘zi quvnaydi.

Universitet kasaba uyushmalar qo‘mitasi hamda rahbariyat tashabbusi bilan tashkil etilgan mazkur bayramda oliygoh rektori Shavkat Sharipov bu kabi an’analarni uzoq yillar davom ettirish kerakligini,   navro‘z bayrami insonlar o‘rtasidagi mehr-oqibat rishtalari yanada mustahkamlanishiga,  bayram bahona ahillik yanada rivojlanishga, millatimizga xos bo‘lgan inoqlik, tinchliksevarlik va mehmondo‘stlikning nishonasi ekanligiga  to‘xtaldi.

Shov-shuvlarga boy, dovrug‘i yetti mahallaga doston Sumalak bazmi ana shunday iliq tilaklar bilan boshlandi. Sumalak bazmi ertaga kechgacha davom etadi.