Oltinchi kun tafsilotlari …
Bugun yakshanba kuni bo‘lishiga qaramay Jizzax davlat pedagogika universiteti hovlisi gavjum. Musiqiy taʼlim yo‘nalishi bo‘yicha kasbiy (ijodiy) imtihon topshiruvchi abituriyentlar qatorida farzandlariga ruhiy dalda bo‘lib, ular bilan hamroh bo‘lib kelgan ota-onalar ham hayajonda. Avval xabar berganimizdek mehmonlar va kuzatuvchi ota-onalar uchun universitet hududida salqin ichimliklar va shinam kutish xonalari va maxsus joylar tashkil qilingan. Universitet Madaniyat saroyida bo‘lib o‘tayotgan imtihon jarayonlarini to‘g‘ridan-to‘g‘ri monitor orqali kuzatib o‘tirgan ota-onalarni suhbatga tortamiz.
-Samаrqand viloyati, Jomboy tumanidan kelganmiz. O‘g‘lim bolaligidan doira chalishni o‘rganib keladi. Shu yo‘nalishda tahsilni oliygohda davom ettirmoqchi. Imtihon jarayonlarni ayolim bilan kuzatib o‘tiribmiz. Xuddi o‘zim imtihon topshirayotgandek hayajondaman. O‘g‘lim qatori yaxshi umidlar bilan kelgan abituriyentlarga omad tilayman. Salqin xonalarda jarayonlarni kuzatib,barcha ota-onalar suhbatlashib kutib o‘tiribmiz. Bugunning o‘zida imtihon javoblari chiqar ekan. Ota-onalar xursand, kayfiyatimiz yaxshi, shu kayfiyat farzandlarimizga yuqsin,- deydi Xasan Oripov
— Bugun qizim universitetning musiqa taʼlimi yo‘nalishida ijodiy imtihon topshirmoqda, — deydi G‘allaorol tumanidan kelgan abiturientlardan birining onasi Dilafro‘z opa — Qizimning kichkinaligidan shu sohaga bo‘lgan qiziqishini ko‘rib, qo‘llab-quvvatlashga harakat qildik. U musiqa sirlarini o‘rganib, mashhur musiqachi bo‘lishni oldiga maqsad qilgan. Mana, bugun universitetga kelib, imtihon jarayonlari qanday o‘tayotganligini to‘g‘ridan-to‘g‘ri kuzatib o‘tiribmiz. Quvonib o‘tiribman, ko‘nglimda umid bilan qizimga omad tilab o‘tiribman, imtihonlar shaffof va adolatli o‘tayotganini kuzatib o‘tiribmiz, ishonaman qizim albatta uddalaydi…
hozirgina imtihon topshirib chiqqan yigitga “qanday o‘tdi nima qilding, yaxshi topshirdingmi? Hakamlar nima dedi”- deya o‘rab olgan tengdoshlari qatorida turgan abiturientni biz ham savolga tutdik.
— Musiqiy taʼlim yo‘nalishiga hujjat topshirdim va bugungi imtihonda o‘zimning tayyorgarligimni namoyon etishga harakat qildim, — deydi Rustamjon – O‘tgan yillarda ham oliy o‘quv yurtiga hujjat topshirib, kira olmagan edim. Bu yil ustozlarimiz bilan yaxshi tayyorgarlik ko‘rib, imtihonda ham yaxshi natijalarga erishishga harakat qildim. Imtihon adolatli o‘tyapti deb hisoblayman. Chunki, barcha abituriyentlarga o‘z natijalari shu kuning o‘zida, hech qanday to‘siqlarsiz maʼlum qilinmoqda. Har bir abiturient o‘zini yo‘nalishidan kelib chiqqan holda o‘zidagi mavjud bilimlarini ishga solib, hayajonini yengib imtihon topshirmoqda. O‘zim kabi bugungi imtihonga kelgan barcha abituriyentlarga, tengdoshlarimga omad tilayman.
