Jizzax davlat pedagogika universitetida 2024/2025 o‘quv yili yakunlanayotganini inobatga olgan holda, kafedralar kesimida o‘quv yili davomida amalga oshirilgan faoliyatlar yuzasidan hisobot yig‘ish ishlari tizimli ravishda olib borilmoqda.
Hisobotlarda kafedralarning o‘quv-uslubiy, ilmiy-tadqiqot, ma’naviy-ma’rifiy ishlari, professor-o‘qituvchilarning yillik yuklama bajarilishi, elektron tizimdagi faoliyat samaradorligi va talabalarning o‘zlashtirish ko‘rsatkichlari atroflicha tahlil etilmoqda.
Mazkur jarayon universitetda faoliyatning shaffofligini ta’minlash, raqamli boshqaruv samaradorligini oshirish va ta’lim sifati ustidan muntazam monitoring olib borishda muhim ahamiyat kasb etadi.
Hisobotlarni yig‘ish jarayonida O‘quv ishlari bo‘yicha prorektor F.Jo‘raqulov, Ilmiy ishlar bo‘yicha prorektor G‘.Qodirov, O‘quv-uslubiy boshqarma boshlig‘i X.Hamzayev, Ta’lim jarayonini tashkil etish bo‘limi, Yoshlar bilan ishlash, ma’naviyat va ma’rifat bo‘limi hamda Iqtidorli talabalarning ilmiy-tadqiqot faoliyatini tashkil etish bo‘limi mas’ullari faol ishtirok etmoqda.
Ta’kidlash joiz, hisobotlar natijalari umumlashtirilib, universitet rahbariyati tomonidan tegishli xulosalar asosida kafedralar faoliyatini takomillashtirish bo‘yicha zarur chora-tadbirlar belgilanishi rejalashtirilgan.
