Magistratura bo‘limi tashkil etgan uchrashuvga tajribali ustozlar — professor Faniya Ahmedshina hamda dotsent Raya Nurqulova taklif etildi.

Magistrantlar ishtirokida bo‘lib o‘tgan tadbir samimiy va jonli muloqot ruhida o‘tdi. Uchrashuvni Magistratura bo‘limi boshlig‘i R. Yarmatov ochib berdi. Unda ustoz–shogird an’analari, ilmga muhabbat, kasbiy kamolot hamda jamiyatga foydali, ma’naviy barkamol inson bo‘lib yetishish kabi ezgu g‘oyalar atroflicha muhokama qilindi.

Mehmon ustozlar o‘z hayot yo‘li, ilmiy faoliyati va tajribalari bilan o‘rtoqlashib, yosh tadqiqotchilarga qimmatli maslahatlar berdilar.Tadbir davomida savol-javoblar qismi alohida qiziqish uyg‘otdi. Magistrantlar ilm dargohida o‘z o‘rniga ega bo‘lgan ustozlarga kasbiy faoliyat, ilmiy izlanishlar va hayotiy tajriba bilan bog‘liq savollar bilan murojaat qilib, foydali maslahatlar oldilar.

Tadbir yakunida faol ishtirok etgan magistrantlar tashakkurnomalar bilan taqdirlandi. Shuningdek, uchrashuv mehmonlari — professor Faniya Ahmedshina va dotsent Raya Nurqulovaga esdalik sovg‘alari topshirildi.

Mazmunli va ilhombaxsh tarzda o‘tgan ushbu uchrashuv magistrantlar uchun katta taassurot qoldirdi hamda ularni yangi ilmiy marralar sari undadi.