Jizzax davlat pedagogika universiteti hovlisida Jizzax viloyati Favqulodda vaziyatlar boshqarmasi bilan hamkorlikda o‘quv mashg‘uloti — amaliy ko‘rgazmali tadbir o‘tkazildi.
Mazkur tadbirning asosiy maqsadi talaba va professor-o‘qituvchilarda favqulodda holatlarda to‘g‘ri harakat qilish ko‘nikmalarini shakllantirish, xavfsizlik madaniyatini oshirish va tezkorlik bilan to‘g‘ri qaror qabul qilish malakasini mustahkamlashdan iborat bo‘ldi.
Amaliy mashg‘ulot davomida Favqulodda vaziyatlar boshqarmasi xodimlari zilzila, yong‘in va texnogen halokatlar kabi favqulodda holatlar yuz berganda aholini evakuatsiya qilish, jabrlanganlarga birinchi tibbiy yordam ko‘rsatish va yong‘inni o‘chirish jarayonlarini amaliy tarzda namoyish etdilar.
Talabalar va universitet xodimlari mutaxassislarning ko‘rsatmalari asosida xavfsizlik choralarini o‘rganishdi hamda amaliy mashqlarda faol ishtirok etishdi. Tadbir davomida xavfsizlik texnikasi bo‘yicha tavsiyalar berildi, zaruriy jihozlar va texnik vositalarning ishlash tartibi tanishtirildi.
Tadbir yakunida Favqulodda vaziyatlar boshqarmasi mutaxassislari tomonidan o‘quv mashg‘uloti ishtirokchilariga sertifikatlar topshirildi va bunday mashg‘ulotlar muntazam o‘tkazilib borilishi ahamiyati ta’kidlandi.
