Maktabgacha va maktab ta’lim vaziri E’zoza Karimova Jizzax davlat pedagogika universitetiga tashrifi davomida ta’lim muassasasida yaratilgan shart-sharoitlar, amalga oshirilayotgan islohotlar va innovatsion yangiliklar bilan yaqindan tanishdi.

Dastlab vazir 7/24 rejimida talaba va o‘qituvchilarga xizmat ko‘rsatayotgan Axborot-resurs markazi (ARM) faoliyatini ko‘zdan kechirdi. Bu yerda kitobxonlik madaniyatini oshirish, zamonaviy elektron kutubxona xizmatlari, shuningdek, ilmiy tadqiqotlar uchun keng imkoniyatlar yaratilgani ta’kidlandi.

Shundan so‘ng u universitetda faoliyat yuritayotgan “Registrator ofisi”da bo‘lib, talabalar uchun yaratilgan qulayliklar bilan tanishdi. Mazkur ofis orqali hujjatlarni tezkor va shaffof tartibda rasmiylashtirish, talabalarning ta’lim jarayonidagi ma’lumotlarini yagona elektron bazada yuritish imkoniyatlari mavjudligi qayd etildi.

Tashrif davomida E’zoza Karimova universitetda amalga oshirilayotgan ijtimoiy-iqtisodiy o‘zgarishlar, yangi qurilish ishlari, ta’mir va rekonstruksiya jarayonlari, shuningdek, ta’lim tizimidagi ilg‘or yangiliklar bilan ham tanishdi.

Vazir universitet jamoasi tomonidan yaratilayotgan qulay muhitni ijobiy baholab, talaba-yoshlarning bilim olishi, ilmiy izlanishlar olib borishi va erkin fikrlashi uchun sharoitlar yanada kengayib borayotganini alohida ta’kidladi.