2025-yil 7-iyul kuni Jizzax Davlat pedagogika universitetiga (JDPU) navbatdagi rasmiy tashrif bilan Hindistonning National Heart Institute xalqaro hamkorlik direktori Dr. Anand Kumar Tripathi boshchiligidagi delegatsiya kelib, JDPU bilan o‘zaro hamkorlikni yanada kengaytirish yuzasidan muzokaralar olib bordi. Delegatsiya tarkibida Zafar Khan hamda Hindistonning Janessa Educare konsalting firmasi direktori Jerry Mendes ham ishtirok etdi.
Uchrashuvda asosiy e’tibor JDPUdagi tibbiyot yo‘nalishiga Hindistonlik talabalarni jalb qilish masalasiga qaratildi. Shu munosabat bilan mehmonlar universitet infratuzilmasi, xususan, fakultet binolaridagi auditoriyalar, ma’ruza zallari, Ro‘yxatga olish (Registrator) bo‘limi faoliyati hamda talabalar uchun barcha sharoitlarga ega bo‘lgan yotoqxona bilan tanishishdi. 24 soat faoliyat yurituvchi hamda turli sohalarga oid boy kitob fondiga ega zamonaviy kutubxona mehmonlarda katta taassurot qoldirdi.
Tashrif doirasida, talabalarning nazariy bilimlarini amaliyotda mustahkamlashlari uchun yaratilgan sharoitlar bilan yaqindan tanishish maqsadida, Dr. Anand boshchiligidagi mehmonlar Jizzax shahridagi qator tibbiyot muassasalariga ham tashrif buyurishdi.
