Bugun Jizzax davlat pedagogika universitetida “Ochiq eshiklar kuni” yuqori tashkiliy darajada o‘tkazildi. Tadbirda viloyatdagi turli ta’lim muassasalari, jumladan, O‘zbekiston Milliy universiteti Jizzax filiali talabalari ham faol ishtirok etdi.

Tadbirning asosiy maqsadi abituriyentlar va ularning ota-onalariga universitetdagi ta’lim jarayonlari, mavjud yo‘nalishlar, ilmiy faoliyat, talabalar uchun yaratilgan zamonaviy infratuzilma hamda shart-sharoitlar haqida keng qamrovli ma’lumot berishdan iborat bo‘ldi.

Mehmonlarga universitetning yangi laboratoriyalari, yuqori texnologiyalar bilan jihozlangan o‘quv xonalari, kutubxona, talabalar turar joyi hamda sport infratuzilmasi namoyish etildi. Shuningdek, mehmonlar professor-o‘qituvchilar tarkibi va ularning ilmiy izlanishlari bilan yaqindan tanishish imkoniga ega bo‘lishdi.

Ochiq eshiklar kuni doirasida tashkil etilgan ekskursiyalar, prezentatsiyalar va jonli muloqotlar orqali kelajakda talabalikka qadam qo‘yish niyatidagi yoshlar orasida universitetga bo‘lgan qiziqish yanada ortdi. Tadbir ishtirokchilari o‘z taassurotlarini baham ko‘rar ekan, ushbu tashrif ular uchun juda foydali va ilhomlantiruvchi bo‘lganini ta’kidlashdi.