Xalqaro Nordik universiteti tomonidan Finlandiyaning Helsinki, Jyväskylä, Kareliya va JAMK amaliy fanlar hamda pedagogika institutlari bilan hamkorlikda tashkil etilgan malaka oshirish kursi ikki hafta davomida yuqori saviyada o‘tkazildi.
Yurtimizdagi 10 ta oliy ta’lim muassasasining 25 nafar rahbar xodimlari va professor-o‘qituvchilari ikki hafta davomida Finlandiya ta’lim tizimini keng o‘rgandilar.Ushbu professor*o‘qituvchilar oraisda JDPUdan 3 nafar o‘qituvchilar ishtirok etishdi.
Kurs davomida Finlandiyaning ta’lim ekspertlari ko‘magida maktabgacha ta’lim, maktab, yuqori sinf va oliy ta’lim tizimlari hamda xalqaro baholash tizimi bilan tanishildi.
Finlandiya bo‘ylab bolalar va yoshlarning o‘qishi uchun professional yordam beruvchi Valteri ta’lim va konsalting markazi tajribalari asosida inklyuziv ta’lim tizimining o‘ziga xos xususiyatlari o‘rganildi.
Shuningdek, kurs tinglovchilari Kareliya amaliy fanlar universitetida seminar-treninglarda qatnashdilar. Finlandiya oliy ta’lim sohasidagi yurtimiz ta’lim tizimini isloh qilishda qo‘l keladigan ilg‘or tajribalarni o‘rganishga e’tibor qaratildi.
Trening va amaliy mashg‘ulotlarda qo‘shma dasturlar ishlab chiqish tartiblari, zamonaviy, innovatsion o‘quv muhiti va vositalari, o‘quv rejalari bilan tanishildi.
Karelia AF universiteti (rektori Petri Raivo) bilan yurtimiz OTMlari o‘rtasida strategik hamkorlik mustahkamlanib, o‘zaro Anglashuv memorandumlari imzolandi.
Kurs tingovchilari O‘zbekistonning Shvetsiyadagi elchixonasiga ham tashrif buyurib, elchi bilan uchrashdilar.
Finlandiyada malaka oshirish kursi qizg‘in bahs-munozaralar, muhokamalarga boy o‘tdi, yangi xorijiy bilim va ko‘nikmalar egallandi. Kurs yakunida ishtirokchilar Sertifikatlar bilan taqdirlandilar.
