Jizzax davlat pedagogika universitetida buyuk davlat arbobi, sarkarda va shoir Zahiriddin Muhammad Bobur tavalludining 543-yilligi munosabati bilan “Nazm va navo” nomli adabiy-badiiy kecha yuqori saviyada tashkil etildi.

Tadbirda universitet rahbariyati, professor-o‘qituvchilar va talaba-yoshlar ishtirok etdilar. Kecha dasturi Bobur hayoti va ijodiga bag‘ishlangan sahna ko‘rinishi bilan boshlandi.

Tarix fakulteti talabalari tomonidan “Zahiriddin Muhammad Boburning avlodlarga murojaati” mavzusida tayyorlangan sahnaviy chiqish tomoshabinlarda katta taassurot qoldirdi.

Belgilangan dastur asosida boshlovchi nutqi bilan kecha mazmunan boyitildi. Har bir musiqiy ijro oldidan Bobur g‘azallaridan namunalar o‘qilib, she’r va kuy uyg‘unligi ta’minlandi.

Kecha davomida Boburning “Yaxshilig‘”, “Mushkildur”, “Sharobi”, “Lola”, “Guljamol” kabi g‘azallari musiqiy talqinda ijro etildi. Asarlar universitetning Musiqiy ta’lim yo‘nalishi o‘qituvchilari, talabalari hamda talabalar maqom ansambli xonandalari tomonidan mahorat bilan ijro etildi.

Kechadan ko‘zlangan maqsad — buyuk ajdodimiz merosini keng targ‘ib etish, talaba-yoshlarda vatanparvarlik va milliy g‘urur tuyg‘ularini mustahkamlashdan iborat bo‘ldi.