“Milliy qadriyatlar va ularning millat ma’naviyatidagi o‘rni” hamda “Men diniy ekstremizm va terrorizm tahdidini qanday tushunaman” mavzularida davra suhbati o‘tkazildi. Unda viloyat va universitet rahbariyati, huquqni muhofaza qiluvchi organlar vakillari, professor-o‘qituvchilar hamda talaba-yoshlar ishtirok etdi.

Tadbirda so‘zga chiqqanlar milliy qadriyatlar xalqimizning asrlik tarixiy tajribasi va ma’naviy merosiga tayangan holda jamiyat barqarorligi va taraqqiyotining mustahkam poydevori ekanini ta’kidladilar. Globallashuv sharoitida turli mafkuraviy ta’sirlar kuchayib borayotgan bir paytda yoshlar ongida mustahkam ma’naviy immunitetni shakllantirish ustuvor vazifa ekani qayd etildi.

Shuningdek, diniy ekstremizm va terrorizmning asl mohiyati, ularning jamiyat xavfsizligiga solayotgan tahdidlari atroflicha tahlil qilindi. Mutaxassislar radikal g‘oyalarning ko‘pincha diniy tushunchalarni noto‘g‘ri talqin qilish orqali yoshlarni chalg‘itishga qaratilayotganini, bunday holatlarga qarshi huquqiy savodxonlik, tanqidiy fikrlash va ishonchli manbalarga tayanish muhim ahamiyat kasb etishini urg‘uladilar.

Ochiq muloqot tarzida o‘tgan davra suhbatida talabalar o‘z fikr-mulohazalarini erkin bildirdilar. Yakunda yoshlar o‘rtasida diniy bag‘rikenglik, millatlararo totuvlik va fuqarolik mas’uliyatini mustahkamlash bo‘yicha targ‘ibot ishlarini izchil davom ettirish zarurligi alohida qayd etildi.