Tashkil topishi

Kafedra 1974-yil sentyabr oyida institutda siyosiy ta’lim berishga qaratilgan Marksizm–Leninizm asoslari nomi bilan tashkil etildi. Uning ilk mudiri iqtisod fanlari nomzodi, dotsent Hayitboy Haydarov bo‘lib, dastlabki yillarda T. Javlonov, S. Anorboyev, S. Boymatov, R. Xolmurodov kabi o‘qituvchilar faoliyat olib bordilar. 1991-yil 22-apreldagi Vazirlik buyrug‘iga ko‘ra, barcha pedagogika oliy va o‘rta maxsus o‘quv yurtlarida O‘zbekiston tarixini o‘rganish joriy qilinib, institutda O‘zbekiston tarixi kafedrasi alohida tashkil etildi.
 

Rivojlanish bosqichlari

1974–1983-yillarda Hayitboy Haydarov, 1983–1985-yillarda Rashid Xolmurodov, 1985–1988-yillarda Solijon Boymatov, 1988–1990-yillarda Abdurazzoq Abulqosimov, 1990-yildan boshlab Sa’dulla Abdullayev kafedrani boshqargan. Mustaqillikdan keyingi davrda R. Xolmurodov rahbarligida yuqori malakali kadrlar shakllantirildi. Keyinchalik T. Omonjulov, Muxtor Pardayev, Ahror Pardayev, Akbar Valiyev, Furqat Toshboyev, Abdurasul Amanlayev kabi mutaxassislar mudirlik qilgan. 2012-yilda O‘zbekiston tarixi va Umumiy tarix kafedralari birlashtirilib, “Tarix o‘qitish metodikasi” nomi bilan faoliyat yuritdi, 2022–2023-o‘quv yilidan esa ular yana alohida tashkil etildi.
 

Bugungi faoliyati

Hozirda kafedraga tarix fanlari bo‘yicha falsafa doktori (PhD), professor Furqat Toshboyev rahbarlik qilmoqda. Jamoa tarkibida Raya Nurqulova, R. Xolmurodov, Muxtor Pardayev, Farrux Aqchayev, D. Xolmurodov, Begzod Mirzayev kabi ilmiy darajali mutaxassislar bor. Kafedra “O‘zbekiston tarixini zamonaviy pedagogik texnologiyalar asosida o‘rganish hamda malakali kadrlar tayyorlashda xorijiy tajriba va ta’lim integratsiyasi” mavzusida ilmiy izlanishlar olib bormoqda. So‘nggi yillarda kafedra a’zolari tomonidan doktorlik va PhD dissertatsiyalari himoya qilinib, darslik va monografiyalar nashr etildi.