Tashkil topishi

Musiqa ta’limi kafedrasi 1985-yilda Jizzax davlat pedagogika institutida tashkil etilgan. Kafedra dastlab Pedagogika va boshlang‘ich ta’lim metodikasi fakulteti tarkibida faoliyat yuritib, umumta’lim maktablari va madaniyat muassasalari uchun musiqiy ta’lim sohasida malakali kadrlar tayyorlash vazifasini oldiga qo‘ydi. Ilk rahbarlikni taniqli hofiz, dotsent Alijon Hasanov olib borgan bo‘lib, u nafaqat ta’lim sifatini oshirish, balki musiqiy-ma’rifiy tadbirlarni ko‘paytirishga ham katta e’tibor bergan.
 

Rivojlanish bosqichlari

1993-yilda rahbarlikka katta o‘qituvchi Abdumannon Mahammatov tayinlandi. Keyingi yillarda Dilorom Rasulova, Bahodir Ko‘ychiyev, Abdusamad To‘rayev, Berdiyor Quljonov, Rahmatilla Sarimsoqov, Tatyana Kurs, Narzulla Toshtemirov, Ermat Fayzullayev, Nozbuvi Boychayeva, Ismatilla Qudratov, Navbahor Hasanova, Abdurasul Normatov, Rajab Halimov, Fayziqul Zokirov va Toyir Musayev kafedraga rahbarlik qilishdi.
2004-yilda kafedra uch yo‘nalishga ajratildi: Umumiy musiqa va uni o‘qitish metodikasi, Cholg‘u ijrochiligi, Vokal ijrochiligi. 2011–2012-yillarda Umumiy musiqa kafedrasiga Ermat Fayzullayev mudirlik qildi. Keyinchalik bo‘limlar yana birlashtirilib, yagona Musiqa ta’limi kafedrasi sifatida faoliyatini davom ettirdi.
 

Bugungi faoliyati

Hozirda kafedrani katta o‘qituvchi Tohir Haqqulov boshqaradi. Jamoada 26 nafar professor-o‘qituvchi bor: 1 nafar fan nomzodi, 3 nafar dotsent, 15 nafar katta o‘qituvchi va o‘qituvchilar, 7 nafar konsertmeyster. Kafedra tarkibida 300 dan ortiq bakalavr va 8 nafar magistr talaba tahsil olmoqda. O‘quv jarayonida nafaqat musiqiy nazariya va metodika, balki cholg‘u ijrochiligi, vokal san’ati, xor ijrochiligi bo‘yicha ham amaliy mashg‘ulotlar olib boriladi. Talabalar va bitiruvchilar muntazam ravishda respublika va xalqaro tanlovlarda qatnashib, yuksak natijalarga erishmoqda. Bahromova Sabohat Rustam qizi (Zulfiya mukofoti, 2005), Zulxumor Mamarasulzoda (“Nihol” mukofoti, 2013; “Shuhrat” medali, 2020), Abdurazzoqova Mehribon Jaloliddin qizi (MDH tanlovi 1-o‘rin, 2023) kabi yutuqlar shular jumlasidandir.