2025-yil 22-iyundan 5-iyulgacha AQSHda o‘tkazilayotgan “Sun’iy intellekt tomonidan takomillashtirilgan til o‘rganish uchun innovatsiyalar va ilg‘or tajribalar” nomli almashinuv dasturi xalqaro ingliz tili o‘qituvchilari uchun muhim maydon bo‘lib xizmat qilmoqda. Dastur AQSH Davlat departamentining Ta’lim va madaniyat masalalari byurosi, Ingliz tili dasturlari boshqarmasi va FHI 360 tashkiloti hamkorligida amalga oshirilmoqda.
Mazkur dastur K-12 va oliy ta’lim muassasalari vakillariga ingliz tilini o‘qitish bilan bog‘liq ilg‘or yondashuvlar va dolzarb mavzular bo‘yicha fikr almashish imkonini beradi. O‘zbekiston nomidan ushbu dasturda Jizzax davlat pedagogika universiteti Xorijiy tillar fakulteti Ingliz tili nazariyasi va amaliyoti kafedrasi dotsenti Bahriddinova Dildora ishtirok etmoqda.
Dastur ikki bosqichda tashkil etilgan:
🔹 Birinchi bosqich — San-Diego shahrida bo‘lib o‘tib, unda ishtirokchilar sun’iy intellekt (SI) texnologiyalarining ta’limga integratsiyasi, xususan, tabiiy tilni qayta ishlash (NLP), til modellaridan foydalanish va adaptiv ta’lim tizimlari bo‘yicha amaliy bilim va ko‘nikmalarga ega bo‘lishdi.
🔹 Ikkinchi bosqich — ayni paytda Texas shtatining San-Antonio shahrida o‘tayotgan ISTE 2025 konferensiyasi doirasida davom etmoqda. Bu bosqichda ishtirokchilar SI vositalarining sinf va onlayn ta’lim muhitidagi amaliy qo‘llanilishi, ularning imkoniyatlari va potensial cheklovlari yuzasidan muhokamalarda ishtirok etmoqdalar.
Dastur davomida bepul, arzon va kam resurs talab qiluvchi sun’iy intellekt vositalarini aniqlash ham a e’tibor markazida turibdi. Shuningdek, ishtirokchilar amerikalik oila bilan o‘zaro muloqot, madaniy tadbirlarda ishtirok, mahalliy jamoa bilan uchrashuvlar va shaharlar bo‘ylab ekskursiyalar orqali Amerika hayoti va madaniyati bilan yaqindan tanishmoqdalar.
Almashinuv dasturida Xitoy, Turkiya, Peru, Braziliya, Meksika va Rossiya kabi qator mamlakatlardan kelgan mutaxassislar bilan hamkorlikda ish olib borish, turli tajribalarni o‘rganish va madaniy muloqotni rivojlantirish uchun keng imkoniyat yaratmoqda.
