Jizzax viloyati hokimligi, davlat xafsizligi viloyat boshqarmasi, ichki ishlar idoralari vakillari, respublika Musulmonlar idorasi Jizzax viloyat bo‘limi xodimlari, Milliy madaniy markazlar hamkorligida tashkil etilgan tadbirda Jizzax davlat pedagogika instituti o‘qituvchilari va talabalar qatnashdi.
Bag‘rikenglik o‘zbek xalqi ma’naviyati va madaniyatining ajralmas qismi hisoblanadi. Yurtimizda nafaqat ijtimoiy-iqtisodiy, siyosiy sohalar, balki zaminimizda istiqomat qilib kelayotgan turli millat va elatlar o‘rtasida do‘stlik rishtalarini yanada mustahkamlash, diniy bag‘rikenglik tamoyillarini qaror toptirishga ham alohida e’tibor qaratib kelinadi.
Bu, ayni paytda O‘zbekistonning barcha sohadagi islohotlarida ham o‘z aksini topgan. Xususan, “2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi”ning beshinchi yo‘nalishi aynan diniy bag‘rikenglik va millatlararo totuvlikni ta’minlash masalasiga bag‘ishlangani mamlakat Prezidenti va hukumatining xalqaro hujjatlarda belgilangan umuminsoniy vazifalarga qaratayotgani yuksak e’tiborining namunasi hamdir. Tadbir avvalida ishtirokchilarga yurtimiz kinoijodkorlari tomonidan real voqealarga asoslangan “ Mehr operatsiyasi” hujjatli filmining namoyishi tomoshobinlarda zalolat va qabohatga nafrat , yolg‘on va’dalarga uchib, bilib-bilmay boshqa dunyoni orzu qilib “ urush o‘chog‘i”dan ming azoblar bilan o‘z yurtiga qaytarib olib kelingan insonlar taqdiriga achinish hissini uyg‘otdi. Bir so‘z bilan aytganda “adashganlar”taqdiri yoshlarimizga saboq bo‘lishi ta’kidlandi.
Tadbirda bugun yurtmizda turli millat va elatlar, diniy konfessiyalar vakillari o‘rtasidagi ahil-inoqlik, hamjihatlikni ta’minlash borasida amalga oshirilayotgan ishlar, tinchlik-osoyishtalik, barqarorlikni saqlash yo‘lida olib borilayotgan oqilona islohotlar, amaliy chora-tadbirlar haqida so‘z yuritildi.
Uchrashuv ishtirokchilaridan biri — Jizzax viloyat IIB vakili Ma’ruf Homidovning ta’kidlashicha, O‘zbekiston rahbariyatining sa’y-harakatlari bilan biz tinchlik, do‘stlik va o‘zaro hamjihatlikda hayot kechirmoqdamiz. Mamlakatda turli millat va elatlar, diniy konfessiya vakillarining yaratuvchanlik kayfiyatida yashashi uchun barcha sharoitlar yaratilgan. Bugun talaba yoshlarimizdan nima talab etiladi. Albatta a’lo baholarga o‘qish va yurtga munosib farzand bo‘lish. Bilib-bilmay turli oqimlar ta’siriga tushmaslik uchun esa faqatgina o‘qish va ustozlar o‘gitiga quloq solish zarur.
-Bugungi kunda bag‘rikenglik insoniyat tomonidan erishilgan eng katta yutuqlardan biridir. Bundan keyingi taraqqiyot uchun ham u muhim omillardan bo‘lib qolaveradi. O‘zbekistonda turli konfessiya vakillari o‘rtasida mustahkam do‘stlik, bag‘rikenglik muhiti ta’minlangan, yoshlarning bo‘sh vaqtlarini samarali ta’minlash maqsadida esa bugun 5 ta muxim tashabbus bo‘yicha juda katta ishlar amalga oshirilmoqda. Hayot insonga bir marta beriladi, yosh umrini turli yot g‘oyalar asosida barbod qilmaslik o‘z qo‘limizda -deydi Jizzax viloyati hokimligi kotibiyat mudiri Nurali Rayimov.
Shuningdek uchrashuv davomida viloyatimida istiqomat qilayotgan ko‘plab millat va elat vakillari, turli milliy-madaniy markazlar faoliyati, ularning o‘z ona tili, millati tarixi, qadriyatlari va madaniyatini o‘rganish borasida amalga oshirayotgan keng ko‘lamli ishlar to‘g‘risida kelajak avlod egalari – yoshlarga ma’lumot berildi.
Jizzax davlat pedagogika instituti axborot xizmati
