Tashkil topishi

Umumiy tarix kafedrasining ildizlari Jizzax davlat pedagogika instituti davriga borib taqaladi. Avvaliga u Marksizm-leninizm asoslari, keyinchalik KPSS tarixi va siyosiy iqtisod kafedralari tarkibida faoliyat yuritgan. 1991-yildan Iqtisodiyot nazariyasi kafedrasi deb atalgan. Mustaqil kafedra sifatida esa 1999-yilda O‘zbekiston tarixi kafedrasidan ajralib chiqdi. Kafedraning asosiy maqsadi — talabalarni jahon tarixi, sivilizatsiyalar taraqqiyoti, madaniy meros va tarixiy manbalar bilan tanishtirish, tarixiy tafakkurni shakllantirishdan iborat bo‘lgan. Ilk mudiri tarix fanlari nomzodi, dotsent Baxtiyor Mirkomilov edi.
 

Rivojlanish bosqichlari

1999–2009-yillarda Baxtiyor Mirkomilov kafedra rahbari sifatida uning ilmiy salohiyatini oshirishga katta hissa qo‘shdi. Bu davrda kafedrada yangi fanlar joriy qilindi, o‘quv qo‘llanmalar yaratildi, talabalar uchun tarixiy manbalar asosida amaliy mashg‘ulotlar yo‘lga qo‘yildi. Keyingi yillarda kafedraga t.f.n. Abdurasul Boltayev rahbarlik qildi. 2022-yilda esa PhD Jasur G‘ofurov kafedra mudiri bo‘ldi. 2023-yildan boshlab t.f.n., dotsent Axror Pardayev rahbarlik qilib kelmoqda. Shu yillar davomida kafedrada “Tarix” ilmiy-tadqiqot markazi tashkil etilib, yirik mahalliy tarixiy asarlar — “Jizzax – mo‘jizalar o‘lkasi”, “Jizzax viloyati sudlari tarixi” va “Qaliya mahallasi tarixi” kitoblari nashr etildi.
 

Bugungi faoliyati

Hozirgi kunda kafedrada 16 nafar asosiy shtatdagi professor-o‘qituvchilar ishlaydi, ulardan 3 nafari fan doktori, 3 nafari fan nomzodi, 3 nafari falsafa doktori (PhD) bo‘lib, umumiy ilmiy salohiyat 50 foizni tashkil etadi. Kafedra tarkibida “Mehnat shuhrati” ordeni sohibi, t.f.d., professor Faniya Axmedshina, t.f.n., professor Baxtiyor Mirkomilov, p.f.d., professor Rahimboy Yarmatov, t.f.d. Abdurasul Boltayev, shuningdek, PhD Nargiza Karimova, Dilafro‘z Eshbekova, Munira Xo‘janova kabi taniqli olimlar faoliyat yuritmoqda. Kafedra xalqaro hamkorlik, tarixiy merosni tadqiq etish va yosh tarixchilarning ilmiy salohiyatini oshirish yo‘nalishlarida faol ish olib bormoqda. Talabalar tarixiy ekspeditsiyalar, konferensiyalar va ilmiy tanlovlarda muntazam ishtirok etib, yutuqlarga erishmoqda.