Tashkil topishi

Kafedra 1977-yilda “Umumiy texnika fanlari” nomi bilan, Umumiy fizika kafedrasi bazasida tashkil etilgan. Uning ilk mudiri biologiya fanlari nomzodi, dotsent Isomiddin Jumayev bo‘lib, texnika fanlarini o‘qitish va amaliy mashg‘ulotlarni rivojlantirishga asosiy e’tibor qaratilgan. Keyinchalik “Tasviriy san’at va muhandislik grafikasi” sohasi ham shakllanib, mustaqil kafedra sifatida faoliyat yuritgan. Bu bo‘limga dotsent Kamoliddin Zoyirov va katta o‘qituvchi Pardaboy Xudoyberdiyev rahbarlik qilgan. 2021–2022-o‘quv yilidan boshlab ikkala yo‘nalish birlashtirilib, hozirgi “Texnologik ta’lim va tasviriy san’at fanlari” kafedrasi tashkil etildi.
 

Rivojlanish bosqichlari

1978–1995-yillarda Shoxisrav Obloqulov, Erkin Ergashev, Xolbo‘ta To‘raqulov, Xo‘jamberdi Tog‘ayev, Jo‘raqul Nurmatov kabi mutaxassislar mudirlik qilgan. 1995-yildan boshlab esa Sa’dulla Ubaydullayev, Ne’matilla G‘afforov, Meli Murtazoyev, Rahim Umarov, To‘ychi Ismoilov kabi tajribali rahbarlar kafedraga boshchilik qildi. Tasviriy san’at va muhandislik grafikasi kafedrasi 2001-yilda Vazirlar Mahkamasining qaroriga asosan tashkil etilib, dastlabki yillarda Pardaboy Xudoyberdiyev rahbarlik qilgan. 2004–2009-yillarda birlashtirish va qayta nomlash ishlari amalga oshirildi, 2015–2021-yillarda yana Pardaboy Xudoyberdiyev mudirlik qildi. 2021-yildan esa dotsent Muhammad Yusupov rahbarlik qilib kelmoqda.
 

Bugungi faoliyati

Kafedrada hozir 30 nafar professor-o‘qituvchi faoliyat yuritadi, shundan 7 nafari fan nomzodi, 5 nafari dotsent unvoniga ega. Asosiy ta’lim yo‘nalishlari: Texnologik ta’lim, Tasviriy san’at va muhandislik grafikasi, Dizayn (libos va gazlamalar), Rang-tasvir (dastgohli). Magistratura bosqichida esa “Ta’lim-tarbiya nazariyasi va metodikasi (texnologik ta’lim)” mutaxassisligi bo‘yicha kadrlar tayyorlanadi. So‘nggi yillarda kafedra a’zolari tomonidan 15 ta darslik, 12 ta o‘quv qo‘llanma, 12 dan ortiq monografiya, 1500 ga yaqin ilmiy maqola chop etilgan. Kafedra Qozog‘istonning Muxtor Avezov nomidagi milliy universiteti kabi xorijiy hamkorlar bilan ilmiy va ijodiy loyihalarni amalga oshirmoqda.