Tashkil topishi

Ingliz tili amaliy kursi kafedrasi 2018-yilda tashkil topgan bo‘lib, o‘sha vaqtda faoliyat yuritgan Ingliz tili va adabiyoti o‘qitish metodikasi kafedrasi negizida vujudga kelgan. Kafedrani dastlab 2018–2022-yillar davomida Shahnoza Uzoqova boshqargan. 2022-yildan buyon kafedraga dotsent Sevara Hamidova rahbarlik qilmoqda.
 

Rivojlanish bosqichlari

Kafedra tashkil etilganidan beri xorijiy mamlakatlar bilan xalqaro hamkorlik yo‘lga qo‘yildi. Buyuk Britaniyaning Norvich tillar universiteti va Portsmut universiteti bilan hamkorlik natijasida professor-o‘qituvchilar muntazam stajirovkalar o‘tab kelmoqda. 2023-yil avgust oyida kafedraning 8 nafar o‘qituvchisi Norvich universitetida bir oylik malaka oshirdi. Shu bilan birga, kafedra a’zosi Gulnoza G‘aniyeva 2023-yil iyun–iyul oylarida AQSHning Jorjiya shtati Atlanta shahridagi Jorjiya davlat universitetida 7 haftalik malaka oshirish kursida ishtirok etdi.
 

Bugungi faoliyati

Kafedrada ilmiy-pedagogik kadrlar tayyorlashga katta e’tibor qaratiladi. Hozirda 3 nafar doktorant ilmiy tadqiqot ishlari bilan shug‘ullanmoqda. Davlat granti doirasida ingliz tili ta’limini rivojlantirishga qaratilgan loyihalar amalga oshirilmoqda. Kafedra o‘qituvchisi Saodat Sodiqova iqtidorli talabalar bilan hamkorlikda “Easy English Enjoyable” nomli 1-sinflar uchun ingliz tili fanidan mobil ilova ishlab chiqdi va uni Play Market orqali ommalashtirdi. Bundan tashqari, AQSH elchixonasi bilan hamkorlikda “English Access Microscholarship Program” dasturi doirasida ijtimoiy himoyaga muhtoj oila farzandlariga ingliz tilini bepul o‘qitish ishlari olib borildi.