Ta’limdagi korrupsiya — eng oliy jinoyat

Jizzax davlat pedagogika institutida bo‘lib o‘tgan yig‘ilish shu mavzuga bag‘ishlandi. Mamlakatimiz ta’lim tizimini tubdan takomillashtirish, uning sifati hamda samaradorligini oshirish, oliy ta’lim muassasalarining moddiy-texnika bazasini mustahkamlash borasida keng ko‘lamli ishlar olib borilmoqda. Sohadagi islohotlar sabab vaziyat tubdan o‘zgardi, kimning bilimi, qobiliyati, salohiyati bo‘lsa, o‘sha odam o‘qiydi, degan tamoyilga amal qilina boshlandi. Shu bois endilikda ta’limdagi korrupsiyani tag-tomiri bilan yo‘q qilishga astoydil kirishilgani rost. Lekin korrupsiyaga qarshi kurash tobora qat’iy bo‘lib borsa-da, ajiriq kabi uning ildizlari hali-hanuz saqlanib qolgan ko‘rinadi. Harom luqma bilan kun kechirishni o‘ziga odat qilgan ayrim nopok insonlar hozir ham uchrab turgani jamiyatimizdagi sog‘lom muhitga salbiy ta’sir qilmoqda. Aksariyat hollarda pora berish tashabbusi aynan fuqarolarning o‘zidan chiqayotgani, afsuski, achchiq haqiqat. Vaholonki, jamiyatni halol va korrupsiyadan xoli hududga aylantirishga barchamiz birdek mas’ulmiz hamda poraxo‘r kimsalarga qarshi kurashishda fuqarolarimizning harakati asosiy kuchga ega bo‘lishini anglab yetishimiz shart. Professor-o‘qituvchilar ishtirokida bo‘lib o‘tgan yig‘ilishda so‘zga chiqqanlar korrupsiyaning olini olish, unga qarshi kurashishda huquq tartibot organlari vakillari bilan birgalikda ish olib borish, befarq bo‘lmaslik haqida fikr bildirishdi. Yig‘ilishda Jizzax viloyat prokuraturasi boshqarma va bo‘lim boshliqlari R.Pirnazarov, D.Mahramov, M.O‘razalievalar ham ishtirok etishdi.