Tashkil topishi

Ijtimoiy-gumanitar fanlarda xorijiy tillar kafedrasi o‘z ildizlarini 1974-yilda tashkil topgan fakultetlararo Chet tillar kafedrasidan oladi. Mazkur kafedra universitetning barcha nofilologik yo‘nalishlarida ingliz, nemis va fransuz tillarini o‘qitishni yo‘lga qo‘ygan. 2018-yilgacha yagona tuzilma sifatida faoliyat yuritgan ushbu kafedra tarixida turli yillarda Sharofat Botirova, S. Yakubov, Abdujabbor Boymatov, Omon Isarov, Farhod Norbekov va Abdushukur Rustamovlar mudirlik qilgan. 2018-yilda Chet tillar kafedrasi ikkiga bo‘linib, so‘ng 2022-yilda qayta birlashtirildi hamda bugungi nomini oldi. Kafedraning ilk mudiri katta o‘qituvchi Zafar Abdullayev bo‘lib, u hozirgi kunda ham rahbarlik qilmoqda.
 

Rivojlanish bosqichlari

Kafedra 1970–1980-yillarda asosan umumiy chet tili ta’limi berishga yo‘naltirilgan bo‘lsa, 1990-yillardan boshlab turli sohalar uchun maxsus kurslar ishlab chiqdi. 2000-yillarda o‘qitish jarayoniga kommunikativ metodlar, multimedia vositalari va interfaol texnologiyalar joriy etildi. 2018-yilda kafedraning ikki alohida bo‘linmaga ajralishi natijasida ta’lim sifati va yo‘nalishlar bo‘yicha ixtisoslashuv kuchaydi. 2022-yilda esa qayta birlashish orqali tajriba va resurslarni birlashtirish, ta’lim dasturlarini yangilash hamda xalqaro til sertifikatlari bo‘yicha tayyorlov ishlarini kengaytirish imkoniyati yaratildi.
 

Bugungi faoliyati

Hozirgi kunda kafedrada jami 29 nafar professor-o‘qituvchi faoliyat yuritadi. Shulardan 19 nafari ingliz tili, 8 nafari nemis tili, 2 nafari fransuz tili bo‘yicha dars beradi. Kafedra jamoasida 1 nafar fan nomzodi, 2 nafar dotsent, 5 nafar katta o‘qituvchi va 21 nafar stajyor-o‘qituvchi bor. Asosiy faoliyat yo‘nalishlari — ingliz, nemis va fransuz tillarini zamonaviy metodlar asosida o‘qitish, o‘quv jarayonida onlayn platformalar va multimedia resurslaridan foydalanish, talabalarni xalqaro til imtihonlariga tayyorlash hamda ilmiy-uslubiy izlanishlarni rivojlantirishdir.