Xabaringiz bor joriy yilning 28 iyun kuni O‘zbekiston Respublikasi Prezidenti maslahatchisi A.Abduvaxitov boshchiligida pedagogika ta’lim sifatini oshirish va pedagog kadrlar tayyorlovchi oliy ta’lim muassasalari faoliyatini rivojlantirish masalalari bo‘yicha yig‘ilish o‘tkazilgan edi.  Yig‘lishda oliy ta’lim  bilan bog‘liq bir qator dolzarb masalalar qatorida hududlardagi pedagogika oliygohlar faoliyatini yanada takomillashtirish bo‘yicha ishchi guruhi ham tuzilishi aytib o‘tilgan edi.  Respublikamizdagi  pedagogika oliygohlari faoliyatini o‘rganish bo‘yicha jami oltita ishchi guruhi tuzilgan bo‘lib, ularning tarkibiga Oliy va o‘rta maxsus ta’lim vazirligi, Xalq ta’limi vazirligi, Ta’lim sifatini nazorat qilish davlat inspeksiyasi xodimlari, Pedagogik ta’limni rivojlantirish bo‘yicha respublika kengashi a’zolari, Qoraqalpog‘iston Respublikasi Vazirlar Kengashi raisi, viloyat va shaxar hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosarlari kiritilgan. Kuni kecha Prezident ta’lim muassasalari agentligi direktor o‘rinbosari, D.Kenjaev boshchiligidagi  ishchi guruhi  Jizzax davlat pedagogika universitetiga yetib keldi. Tashrifning ilk kunida ishchi guruhi a’zolari universitetda yaratilgan sharoitlar  bilan yaqindan tanishishdi.

Uch kunlik tashrif davomida ishchi guruhi a’zolari oliygoh va uning huzuridagi akademik litseyning imkoniyatlarini chuqur o‘rganish bilan bir qatorda, ta’lim muasassasini malakali professor-o‘qituvchilar bilan to‘ldirish masalalariga alohida e’tibor qaratishadi. Shuningdek, aniqlangan bo‘shliq va takliflardan kelib chiqib universitetning kompleks rivojlantirish manzilli konsepsiyasini ishlab chiqishga ko‘makchi bo‘lishadi. Pedagogika oliygohlari faoliyatini yanada takomillashtirish bo‘yicha tuzilgan ishchi guruhi 23 iyulgacha Jizzax davlat pedagogika universitetida bo‘lishadi.