Jizzax davlat pedagogika universitetida O‘zbekiston Respublikasi Davlat mustaqilligining 35-yilligiga bag‘ishlangan «Mustaqillik to‘yi» bayram tadbiri «Bir Vatan, bir xalq bo‘lib, yangi hayot, yangi kelajakni birgalikda bunyod etaylik!» shiori ostida tantanali tarzda tashkil etildi.

Tadbir universitetning “Professorlar bog‘i”da tashkil etilgan ko‘rgazmalar bilan boshlandi. Unda O‘zbekistonning eng muhim yutuqlari aks ettirilgan “35 yil — 35 yutuq”, milliy tarix va adabiyot kitoblari jamlangan “35 yil — 35 kitob”, buyuk ajdodlar va zamondoshlar hayoti hamda faoliyatiga bag‘ishlangan “Vatan fidoyilari” fotoko‘rgazmasi hamda innovatsion takliflar, startaplar va g‘oyalar namunalari jamlangan “35 ta innovatsion g‘oya” ko‘rgazmalari namoyish etildi.

Shuningdek, millatlararo do‘stlik, bag‘rikenglik hamda milliy va diniy tolerantlikni ifodalovchi “Bir Vatan — bir oila”, universitet tarixi va yutuqlarini aks ettiruvchi “Mening universitetim — mening Vatanim” hamda talaba-yoshlarning mustaqillik yillaridagi yutuq va muvaffaqiyatlariga bag‘ishlangan “Yangi O‘zbekiston yoshlari” ko‘rgazmalari ham tadbir ishtirokchilarida katta qiziqish uyg‘otdi.

Universitet rektori boshchiligidagi rahbariyat vakillari ko‘rgazmalarni aylanib, ularda namoyish etilgan eksponatlar bilan tanishdilar. Ayniqsa, universitet sportchilarining xalqaro va respublika miqyosidagi yutuqlari, talaba-yoshlarning innovatsion ishlanmalari, ijodiy namunalari hamda yosh ijodkorlarning musiqiy chiqishlari tadbir ishtirokchilarida katta taassurot qoldirdi.