Yurtimizda yoshlar siyosatining ustuvor ekanligi yangi tahrirdagi konstitutsiyada ham o‘z isbotini topmoqda. Jumladan, amaldagi konstitutsiyaning “Oila” bobiga o‘zgartirish va qo‘shimchalar kiritilib, “Oila, bolalar va yoshlar” bobi-deb, ataladigan bo‘ldi. Ushbu bobning 79-moddasida:

“Davlat yoshlarning shaxsiy, siyosiy, iqtisodiy, ijtimoiy, madaniy, ekologik huquqlari himoya qilinishini ta’minlaydi, ularning jamiyat va davlat hayotida faol ishtirok etishini rag‘batlantiradi.

Davlat yoshlarning intellektual, ijodiy, jismoniy va axloqiy jihatdan shakllanishi hamda rivojlanishi uchun, ularning ta’lim olishga, sog‘lig‘ini saqlashga, uy-joyga, ishga joylashishga, bandlik va dam olishga bo‘lgan huquqlarini amalga oshirish uchun shart-sharoitlar yaratadi”, – deb belgilangan.

Endilikda yoshlar huquqlarining himoya qilinishi hamda ularning ijtimoiy hayotdagi ishtirokini rag‘batlantirish qonun bilan mustahkamlanmoqda. Chunki aholimizning yarmidan ko‘pini yoshlar tashkil qiladi. Ular uchun munosib shart-sharoitlar yaratish jamiyat rivojining muhim kafolatidir. Bundan tashqari 51-moddada yoshlarning davlat ta’lim tashkilotlarida tanlov asosida davlat hisobidan bepul oliy ma’lumot olish huquqi hamda oliy ta’lim tashkilotlarining qonunga muvofiq akademik erkinligi, o‘zini-o‘zi boshqarish, tadqiqotlar o‘tkazish va o‘qitish erkinligi huquqlari ham qonunan belgilab qo‘yilmoqda. Bu orqali iqtidorli yoshlarning munosib ta’lim olib, yuqori marralarni zabt etishiga imkoniyat yaratiladi.

Amalga oshirilayotgan bu islohotlardan ko‘zlangan maqsad – yoshlarni yuqori malakali va raqobatbardosh kadr etib tarbiyalashdan iborat. Sababi mamlakatimiz ravnaqi biz – yoshlarning qo‘lida. Shunday ekan, bu imkoniyatlardan oqilona foydalanib, yangi O‘zbekistonning yangi konstitutsiyasi yordamida buyuk kelajakni birgalikda quraylik!