Jizzax viloyatidagi ingliz tili o‘qituvchilarining malakasini oshirish, ularga zamonaviy metodik yondashuvlar, innovatsion texnologiyalar va 21-asr ko‘nikmalarini dars jarayoniga tatbiq etishda amaliy ko‘nikmalar berish maqsadida Jizzax davlat pedagogika universiteti, AQSH Elchixonasi hamda Amerika Kengashi hamkorligida “Jizzakh Alumni Community” doirasida navbatdagi ilmiy-amaliy anjuman tashkil etildi.

Joriy yilning 28-noyabr kuni Jizzaxda “Future-Ready English Classrooms: Innovation, Technology, and Skills” nomli konferensiya bo‘lib o‘tdi. Tadbirda Jizzax viloyati ingliz tili o‘qituvchilari, “Jizzakh Alumni” a’zolari, ingliz tili mutaxassislari, assistent o‘qituvchilar hamda ingliz tili o‘rganuvchilari ishtirok etdi.

Anjuman ingliz tili darslarini innovatsion, zamonaviy va o‘quvchi markaziga yo‘naltirilgan metodikalar asosida rivojlantirish, ta’lim jarayoniga yangi texnologiyalarni tatbiq etish, shuningdek o‘qituvchi va o‘quvchilarda XXI asr kompetensiyalarini shakllantirishni maqsad qilgan.

To‘rt soat davom etgan tadbir davomida taqdimotchilar o‘zlarining ilg‘or tajribalari bilan o‘rtoqlashdi. Ishtirokchilar sun’iy intellekt vositalari, raqamli platformalar va interaktiv ilovalar yordamida darslarni samarali tashkil etish bo‘yicha amaliy tavsiyalar oldilar. Muloqot, tanqidiy fikrlash, hamkorlik va ijodkorlik kabi muhim ko‘nikmalarni o‘quv jarayoniga tatbiq etish usullari esa bevosita mashg‘ulotlar orqali namoyish etildi.

Tadbir mahalliy o‘qituvchilar, xalqaro ekspertlar va yosh liderlar o‘rtasida tajriba almashinuvi va professional hamkorlikni yanada mustahkamladi. Konferensiya natijasida ishtirokchilarda zamonaviy dars metodlari bo‘yicha yangi qarashlar shakllanib, Jizzaxdagi ingliz tili ta’limida yangi imkoniyatlar ochildi.

Anjumandan so‘ng o‘qituvchilar o‘z faoliyatida qo‘llashi mumkin bo‘lgan ko‘plab g‘oyalar, texnologik vositalar va metodik yondashuvlar bilan boyib qaytdilar.