Jizzax davlat pedagogika universitetida “Talabalar bahori – 2026” festivali doirasida galakonsert hamda g‘oliblarni taqdirlash marosimi yuqori saviyada tashkil etildi.
Madaniyat saroyida bo‘lib o‘tgan tadbirda universitet rahbariyati, professor-o‘qituvchilar hamda talabalar ishtirok etdi.
Tadbir festivalning eng sara ijodiy chiqishlari bilan boshlandi. Galakonsert davomida talabalarning musiqa, qo‘shiqchilik va raqs san’ati yo‘nalishlaridagi iste’dodlari namoyish etildi.
Festival yakunlariga ko‘ra an’anaviy xonandalik, estrada xonandaligi, cholg‘u ijrochiligi hamda milliy va zamonaviy raqs yo‘nalishlari bo‘yicha g‘olib va sovrindorlar tantanali ravishda taqdirlandi.
Shuningdek, festivalning mutlaq g‘oliblari hamda faol ishtirokchilari tomonidan tayyorlangan konsert dasturi tomoshabinlarga bayramona kayfiyat ulashdi.
“Talabalar bahori – 2026” festivali yoshlarning ijodiy salohiyatini namoyon etish, ularning san’at va madaniyatga bo‘lgan qiziqishini qo‘llab-quvvatlash hamda iste’dodli talabalarni rag‘batlantirishga xizmat qilgan yana bir yirik madaniy-ma’rifiy tadbir sifatida yodda qoldi.
