Avval xabar berganimizdek, Universiada sport o‘yinlari dasturidan joy olgan belbog‘li kurash musobaqalari Jizzax viloyat yakka kurash sport turlariga ixtisoslashtirilgan sport maktabida bo‘lib o‘tdi.
Musobaqada jami 12 ta viloyat Toshkent shahri vf Qoraqalpogiston Respublikasidan 100 ga yaqin kurashchilar 55, 60, 66, 73, 81, 90, +90 kg. vazn toifasida g‘oliblik uchun bellashishdi. Bir so‘z bilan aytganda respublika final bosqichida eng kuchli va iqtidorli sportchilar saralandi.
Jizzax viloyati hokimligi, O‘zbekiston talabalar sporti assotsiatsiyasi, Jizzax viloyati yoshlar siyosati va sport bosh boshqarmasi hamda O‘zbekiston belbog‘li kurash federatsiyasi hamkorligida yuqori saviyada tashkil etilgan musobaqada Umumjamoa hisobda Toshkent viloyati jamoasi faxrli birinchi o‘rinni egalladi. Ikkinchi o‘rinni Farg‘ona viloyati talabalari qo‘lga kiritgan bo‘lsa, uchinchi o‘rin namanganlik talaba-sportchilarga nasib etdi.
Bellashuvlar yakuniga yetgach, g‘olib va sovrindorlarni taqdirlash marosimi bo‘lib o‘tdi. G‘olib va sovrindor sportchi-talabalar diplom, medal va qimmatbaho esdalik sovg‘alari bilan mukofotlandi.
