2025 yil 24 avgust kuni ijtimoiy tarmoqdagi @eltuz2022 Telegram kanalining “Jizzaxda professor-o‘qituvchilar open-byudjet yig‘ishga majbur” sarlavhasi ostida e’lon qilingan murojaat Jizzax davlat pedagogika universiteti rahbariyati tomonidan diqqat bilan o‘rganildi va ushbu masala yuzasidan quyidagi rasmiy munosabat bildiriladi.
Murojaatda keltirilgan “universitet rektori topshirig‘i bilan har bir professor-o‘qituvchi 50 tadan «Open byudjet»ga ovoz yig‘ishga majburlanayotgani, talab qilingan ovoz yig‘ilmasa, bildirishnoma asosida intizomiy chora ko‘rilishi, shuningdek, yangi o‘quv yili boshlanmasidan talabalarga murojaat qilinib, ovoz so‘ralayotgani” haqidagi iddaolar asossiz hisoblanadi.
Ta’kidlash lozimki, professor-o‘qituvchilarga majburiy ravishda ovoz to‘plash bo‘yicha universitet rahbariyati tomonidan hech qanday ko‘rsatma berilmagan va bunday talab fakultet dekanlariga yetkazilmagan.
Jizzax davlat pedagogika universiteti rahbariyati ta’lim muassasasi faoliyatida shaffoflik, ixtiyoriylik va qonun ustuvorligi tamoyillariga amal qilishni qat’iy ravishda ta’minlaydi.
