Jizzax davlat pedagogika universiteti madaniyat saroyida “Birinchi kurs maktabi” tadbirlari start oldi. Unda Maktabgacha va boshlang‘ich ta’lim, Pedagogika-psixologiya va inklyuziv ta’lim fakultetlariga tavsiya etilgan birinchi kurs talabalari hamda professor-o‘qituvchilar ishtirok etdilar.

Tadbirni universitet rektori, professor Maqsudjon Yuldashev ochib berdi. U o‘z nutqida mamlakatimizda ta’lim sohasida amalga oshirilayotgan islohotlar, yaratilayotgan zamonaviy sharoit va imkoniyatlar haqida to‘xtalib, ular yosh avlodning intellektual salohiyatini ro‘yobga chiqarish va raqobatbardosh kadrlar tayyorlashda muhim ahamiyat kasb etayotganini ta’kidladi.

— Jizzax davlat pedagogika universitetini tanlaganingiz uchun sizlarga minnatdorchilik bildiraman. Ishonchim komilki, tanlovingizdan hech qachon afsuslanmaysiz, — dedi rektor o‘z nutqida talabalarga murojaat qilib.

“Boshlang‘ich ta’lim nazariyasi va metodikasi kafedrasi o‘qituvchisi Sanobar Kenjayeva hamda uning iste’dodli shogirdlarining chiqishlari tadbirga yanada mazmun va ruh bag‘ishladi.”

Tantanali marosim davomida fakultetga davlat granti asosida eng yuqori ball bilan qabul qilingan talabalarning ota-onalari hamda tashabbuskor va faol o‘qituvchilarga universitet rahbariyati tomonidan tashakkurnomalar topshirildi.