Jizzax davlat pedagogika universiteti rektori Maqsudjon Abdullayevich Yuldashev boshchiligidagi delegatsiya AQShning Georgia shtatida joylashgan University of Georgia universitetida o‘tkazilayotgan Georgia TESOL 2025 xalqaro konferensiyasi doirasida tashkilot prezidenti Dr. David Chiesa, Alisa Leckie va boshqa vakillari bilan uchrashuv o‘tkazdi.

Suhbat chog‘ida tomonlar TESOL (Teaching English to Speakers of Other Languages) sohasidagi hamkorlik imkoniyatlarini, ingliz tilini o‘qitishning zamonaviy metodlari va o‘qituvchilar malakasini oshirish yo‘llarini muhokama qildilar.

Dr. David Chiesa Jizzax davlat pedagogika universitetining xalqaro miqyosdagi faoliyati, ta’lim sifati va innovatsion yondashuvlarini yuqori baholab, kelgusida o‘qituvchilar uchun malaka oshirish dasturlari, seminar va treninglarni birgalikda tashkil etishdan manfaatdor ekanligini bildirdi.

O‘z navbatida, rektor Maqsudjon Yuldashev Georgia TESOL bilan o‘zaro hamkorlikni yo‘lga qo‘yish, xalqaro ta’lim standartlariga mos o‘quv dasturlarini ishlab chiqish, hamda o‘zaro tajriba almashishning ahamiyatini ta’kidladi.

Uchrashuv do‘stona muhitda o‘tdi va kelgusida Jizzax davlat pedagogika universiteti hamda Georgia TESOL o‘rtasida mustahkam hamkorlik aloqalarini yo‘lga qo‘yish borasida muhim kelishuvlarga erishildi.