BIZ BIRGAMIZ

“BIZ BIRGAMIZ…” Jizzax davlat pedagogika  institutida bo‘lib o‘tgan tadbir ana shunday nomlandi.

Ko‘ngli   kemtik, mehrga muhtoj, jismonan nosog‘lom va nogiron bolalarni moddiy-ma’naviy qo‘llab-quvvatlash  doimiy  va  e’tibordagi ishlarimizdan biridir. 

A.Qodiriy nomidagi Jizzax davlat pedagogika instituti “madaniyat saroyi” da bo‘lib o‘tgan tadbir imkoniyati cheklangan  iqtidorli bolalalarning   rasmlar ko‘rgazmasi namoyishi bilan boshlandi. Yig‘ilganlar e’tirofiga yosh rassom Zulfizar Xalilova tomonidan taqdim etilgan tasviriy sa’nat namunalari sazovor bo‘ldi.  BSP xastaligiga bolaligidan chalingan Zulfizarning chizgan suratlarini kuzatar ekansiz ranglar tasviri orqali mo‘yqalam sohibasining nozik didini his qilasiz. Yosh iste’dod sohibasi Zulfizar  chizgan rasmlarida baxtli bolalik, musaffo osmon, go‘zal tabiat manzaralarini yorqin bo‘yoqlarda  eks ettirgan bo‘lsa, landshaft usulidagi dizayn asosida yaratgan ishlari barchani hayratga soldi.

“Har bir bolaga mehr, e’tibor!” shiori ostida bo‘lib o‘tgan tadbirda so‘zga chiqqanlar inson manfaatlari qadrlanadigan mamlakatimizda yurtimiz egasi bo‘lgan yosh avlodga qaratilayotgan bunday e’tibor va g‘amxo‘rlik har jihatdan e’tirofga loyiq ekanini ta’kidladilar.Bugun Jizzax davlat pedagogika institutida 11   mingdan ziyod  talaba yigit qizlarga 600 ga yaqin prfessor o‘qituvchilar ta’lim tarbiya berishadi. Ayni paytda oliygohda 100  nafardan ziyod imkoniyati cheklangan talabalar tahsil olishadi. Ularning orasida o‘z iqtidori bilan turli ko‘rik tanlovarda ishtirok etib faxrli o‘rinlarni egallagan yoshlarmiz ham bor.Jizzax davlat pedagogika instituti rektori A.Xolbekov  tadbirda   ijodiy mahorati, ixtirosi bilan qatnashgan,  intiluvchan o‘quvchi yoshlarga faxriy yorliq va esdalik sovg‘alarini  topshirdi.

Tadbir davomida ko‘ngli o‘ksik bolajonlarga ko‘rsatilgan mehr va e’tibor, ularning qalbiga shodlik olib kirdi deya ayta olamiz. Buni ularning kulib turgan yuzlari va zavqqa to‘lgan ko‘zlaridan sezib olish qiyin emas edi. Mehr va muravvatni tarannum etguvchi tadbirda Jizzax davlat pedagogika instituti badiiy jamoasi tomonidan konsert dasturi namoyish qilinib, bolalar va yig‘ilganlarga  xush kayfiyat bag‘ishlandi.O‘z navbatida imkoniyati cheklangan bolajonlar ijrosidagi Vatan, do‘stlik, tabiat haqidagi she’r, qo‘shiq va raqslar  badiiy-musiqiy kechaga yanada fayz kiritdi. Tadbir so‘ngida Oliygoh va bir qator tashkilotlar jumladan Jizzax viloyat prokuraturasi, 25 nafar zukko, epchil, bilimdon o‘g‘il-qizlarga qiziqarli ertak kitoblar, sport anjomlari, o‘yinchoqlar taqdim etishdi. Bir so‘z bilan aytganda  shu kuni  Mitti dillar quvonchga to‘ldi! Tashkil etilgan tadbirning asl maqsadi ham shu edi.  

                 Jizzax davlat pedagogika instituti axborot xizmati