Jizzax davlat pedagogika universiteti Madaniyat saroyida o‘tkazilgan uchrashuv, albatta, kelajakda o‘z orzularini amalga oshirish istagida bo‘lgan yoshlar uchun muhim bir qadamdir.
Ushbu tadbirda viloyatdagi oliy ta’lim muassasalarining bitiruvchi talabalari ishtirok etdilar. Tadbir, O‘zbekiston Respublikasi Prezidentining 2025-yil 14-fevraldagi PQ-61-sonli qarori asosida tashkil etildi va yoshlar uchun yangi imkoniyatlarni taqdim etish, ularning mehnat bozoriga kirishini osonlashtirishga qaratilgan.
Uchrashuvni universitetning o‘quv ishlari bo‘yicha prorektori Furqat Jo‘raqulov ochib berdi. Tadbirda so‘zga chiqqan mas’ullar, yoshlarning tadbirkorlikka yo‘naltirilishi, ularning biznes g‘oyalarini qo‘llab-quvvatlash, moliyaviy yordam va imtiyozli kreditlar haqida batafsil ma’lumot berishdi. Dastur doirasida «Kelajakka qadam» tashabbusi orqali bitiruvchi talabalar uchun biznes g‘oyalarini yaratishdan tortib, ularga moliyaviy yordam va qulay shartlarda kreditlar taqdim etilishi, bularning barchasi yoshlarning o‘z ishini boshlash va biznesini rivojlantirish uchun ajoyib imkoniyat ekanligi ta’kidlandi.
Kelajakka Qadam dasturining asosiy maqsadi — talabalarni nafaqat ishga joylashtirish, balki ularni innovatsion g‘oyalarini amalga oshirishga ham rag‘batlantirishdir. Dastur, shuningdek, «O‘zmilliybank» aksiyadorlik jamiyatining qo‘llab-quvvatlashi bilan amalga oshiriladi va uning ishtirokchilari oliy ta’lim muassasalari hisoblanadi. Dasturda yoshlar uchun biznes g‘oyalarni tayyorlash va loyiha darajasiga olib borish, shuningdek, davlat va xususiy sektor bilan hamkorlikda ishlash imkoniyatlari yaratiladi.Bundan tashqari, tadbirda startap-loyihalarni rivojlantirish uchun ajratiladigan grantlar, amaliyot-stajirovka dasturlariga yo‘naltirilgan moliyaviy yordam va yoshlarni ishga joylashtirishning samarali mexanizmlari haqida to‘liq ma’lumot berildi. Uchrashuvda Respublika ishchi guruhi vakillari, xususan, Oliy ta’lim, fan va innovatsiyalar vazirligi bo‘lim boshlig‘i B.Xolmirov, Markaziy bank raisining yoshlar masalalari bo‘yicha maslahatchisi E.Ikromov va «O‘zmilliybank» «Kelajakka qadam» markazi kredit bo‘limi kuratori F.Akmalovlar talabalar tomonidan berilgan savollarga batafsil javob berdilar.
Ochiq va samimiy muloqotda yoshlar o‘zlarini qiziqtirgan barcha savollarni berib, dasturdan qanday foyda olishlarini aniq tushunib oldilar. Uchrashuvda ta’kidlanganidek, yoshlarning bilim va ko‘nikmalarini rivojlantirish, ularni o‘z orzulariga erishishda qo‘llab-quvvatlash davlatimizning eng ustuvor vazifalaridan biridir.
