Jizzax davlat pedagogika universitetining Geografiya laboratoriya xonasida Xalqaro Sirdaryo kunini nishonlash doirasida muhim ma’naviy-ma’rifiy seminar bo‘lib o‘tdi.
Tadbir O‘zbekiston ekologik harakati tomonidan Germaniya xalqaro hamkorlik jamiyati (GIZ) va Shveysariya taraqqiyot va hamkorlik agentligi (SDC) ko‘magida tashkil etildi.
Seminarda respublika ekologik harakati a’zolari, viloyat suv xo‘jaligi va atrof-muhitni muhofaza qilish tashkilotlari mutaxassislari, shuningdek, JDPUning Geografiya va Biologiya kafedralari professor-o‘qituvchilari va magistrantlari ishtirok etdilar.
Tadbir davomida suv resurslaridan oqilona foydalanish, Sirdaryo havzasida ekologik muammolar va ularning yechimlari, mintaqadagi iqlim o‘zgarishlarining ta’siri, biologik xilma-xillikni saqlash kabi dolzarb masalalar bo‘yicha ma’ruzalar tinglandi.
Mutaxassislar tomonidan hudud ekologik barqarorligini ta’minlash, yoshlar o‘rtasida ekologik madaniyatni oshirish va ilmiy tadqiqotlarni rivojlantirish borasida takliflar ham ilgari surildi.
Seminar ishtirokchilari savol-javoblar jarayonida mavzu yuzasidan o‘zlarini qiziqtirgan masalalarga atroflicha javob oldilar. Tadbir yakunida Xalqaro Sirdaryo kunining ahamiyati, mintaqa ekologik muvozanatini ta’minlashda ilm-fan va amaliy hamkorlikning o‘rni alohida ta’kidlandi.
