“Maktabgacha va maktab ta’limi” ilmiy jurnali muharriri Sherzod Qurbonov Jizzax pedagogika universitetida “Ta’lim sifatini oshirishda ilmiy maqolalarning o‘rni” mavzusida ilmiy-amaliy seminar o‘tkazdi. Seminarda universitetning professor-o‘qituvchilari, ilmiy tadqiqotchilar va magistrantlar ishtirok etishdi.

Ilmiy maqolalarni IMRAD qoidasiga muvofiq yozishning ilmiy-uslubiy jihatlari, maqolalarni xalqaro ilmiy bazalarda identifikatsiyalash, iqtiboslash darajasini oshirish va DOI (Digital Object Identifier) platformasida maqolalarni rasmiylashtirish jarayonlari haqida batafsil ma’lumot berildi. Shuningdek, universitet reytingini oshirishda hamda xalqaro ilmiy hamjamiyatda maqolalarning e’tirof etilishida ilmiy jurnallarning ahamiyati muhimligi ta’kidlandi.

Muharrir ta’lim sifatini oshirishda ilmiy maqolalarning ahamiyatiga keng urg‘u berdi. Xususan, ta’lim jarayonida yangi metodologiyalarni joriy qilish, innovatsion tadqiqotlar natijalarini ilmiy hamjamiyatga yetkazish va ularning amaliyotga tadbiq etilishi muhimligi qayd etildi.

Seminar davomida ilmiy maqolalar yozish hamda nashr qilish jarayonlarini samarali tashkil etish yuzasidan tavsiyalar ishlab chiqildi. Ilmiy izlanishlarni rivojlantirish va ta’lim sifatini yangi bosqichga ko‘tarishga bag‘ishlangan seminarda berilgan savollarga batafsil javob berildi.