Bugun Jizzax davlat pedagogika universitetida professor-o‘qituvchilar uchun har shanba kuni o‘tkazilayotgan uzluksiz kasbiy rivojlanish kunlari doirasida “Bilim va o‘zlashtirishni baholash uchun test topshiriqlarini ishlab chiqish hamda natijalarini tahlil qilish” mavzusida seminar-trening bo‘lib o‘tdi.

Seminarni universitet yoshlar masalalari, ma’naviy-ma’rifiy ishlar bo‘yicha birinchi prorektori Farrux Shavkatovich ochib berib, uzluksiz kasbiy rivojlanish seminarlarining professor-o‘qituvchilar salohiyatini oshirishdagi ahamiyatiga to‘xtalib o‘tdi.

Seminar ishini Maktabgacha va maktab ta’limi vazirligi huzuridagi Pedagog kadrlarga malaka toifalarini berish jarayonini tashkil etish va kasbiy sertifikatlash boshqarmasi boshlig‘i Dusnazarov Umidjon Muminjonovich davom ettirib, test topshiriqlarini ishlab chiqish, baholash mezonlarini belgilash hamda natijalarni tahlil qilish bo‘yicha amaliy tushunchalar berdi.

Ma’lumki, universitet Kengashi qaroriga muvofiq, 2025–2026 o‘quv yilining bahorgi semestridan boshlab fan xususiyatlaridan kelib chiqqan holda yakuniy nazorat shakllariga o‘zgartirishlar kiritilgan. Unga ko‘ra, yakuniy nazoratlarda test topshiriqlari ulushi avvalgi semestrlarga nisbatan ancha oshiriladi.

Mazkur seminar aynan shu o‘zgarishlar munosabati bilan professor-o‘qituvchilarni yangi baholash tizimiga tayyorlash, test tuzish va baholash mezonlarini chuqur o‘rganish hamda ularni amaliyotga to‘g‘ri joriy etish maqsadida tashkil etildi.

Ushbu turdagi o‘quv seminarlari professor-o‘qituvchilarning bahorgi semestrdagi yangilangan yakuniy nazorat talablariga puxta tayyor bo‘lishida muhim ahamiyat kasb etadi.