Bugun Jizzax davlat pedagogika universiteti axborot-resurs markazida ommaviy axborot vositalari vakillari va blogerlar uchun navbatdagi press-tur tashkil etildi.
Ishtirokchilar dastlab universitetining 50 yilligi munosabati bilan tashkil etilgan “Universitet tarixi” muzeyi faoliyati bilan tanishishdi.Muzey rahbari Baxtigul Ergasheva jurnalist va blogerlarga muzeyning tashkil etilishi tarixi va u yerdagi tarixiy eksponatlar haqida gapirib berdi.
Shundan so‘ng mehmonlar axborot-resurs markazida tashkil etilgan Besh tashabbus xonasiga tashrif buyurishdi. Bu yerda ular mutaxassislardan Zakovatchi talabalar va kibersportga qiziquvchi yoshlar uchun yaratilgan sharoitlarni ko‘zdan kechirishdi.
Keyingi manzil axborot-resurs markazining yangi ta’mirlangan 3 qavat “Innovatsion axborot xizmatlari“ ko‘rsatish zaliga bo‘lib, ishtirokchilar yangi kelgan adabiyotlar, professor-o‘qituvchilar tomonidan tayyorlangan monografiyalar, o‘quv qo‘llanmalar, darsliklar va talabalar uchun yaratilgan sharoitlar bilan tanishtirildi.
Tadbir davomida ARM direktori Robiya Ishnazarova kutubxona fondi, 2024-yilda amalga oshirilgan ishlar, universitetga qarashli TTJ va fakultetlarda faoliyat yuritayotgan kutubxonalar faoliyati yuzasidan axborot berdi.
