Bugun universitetimizda yoshlar hayotida muhim voqea — “Besh tashabbus olimpiadasi” sport musobaqalari ochilishi bo‘lib o‘tdi. Ushbu tadbir O‘zbekiston Respublikasi Vazirlar Mahkamasi hamda Oliy ta’lim, fan va innovatsiyalar vazirligi topshirig‘i asosida talabalarning bo‘sh vaqtini mazmunli o‘tkazish, salomatligini mustahkamlash va iqtidorlarini qo‘llab-quvvatlash maqsadida tashkil etilmoqda.

20–30-sentyabr kunlari o‘tkaziladigan musobaqalarda talabalarimiz mini-futbol, voleybol, stol tennisi, yengil atletika va stritbol turlarida bellashadilar. Avval fakultetlar ichida saralangan jamoalar keyingi bosqichda fakultetlararo va bosqichma bosqich respublika musobaqalarida chempionlik uchun kuch sinashadi.

Ochilish marosimida so‘zga chiqqan universitet rektori Maqsudjon Yuldashev “Besh tashabbus olimpiadasi”ni yoshlar kuch-g‘ayrati, do‘stlik va hamjihatlik maydoni sifatida ta’kidlab, barcha ishtirokchilarga omad tiladi.

Musobaqaning ilk kungi bellashuvlarini Jismoniy tarbiya va sport fakulteti talaba-yoshlari boshlab berdi. Olimpiada, ishonchimiz komil, talabalarimizga nafaqat g‘alabalar, balki do‘stlik va jamoaviy ruhni mustahkamlash imkoniyatini ham taqdim etadi