Kecha Jizzax davlat pedagogika universitetida “Besh tashabbus olimpiadasi” sport musobaqasining respublika final bosqichida talaba-yoshlarimiz ishtirokini ta’minlash maqsadida tantanali kuzatish marosimi bo‘lib o‘tdi.
Marosimda universitet rektori Maqsudjon Yuldashev boshchiligidagi rahbariyat vakillari, “Pedagog” sport klubi murabbiylari hamda sportchi talabalar ishtirok etdilar.
Tadbir davomida rektor Maqsudjon Yuldashev talaba-sportchilarni quvvatlab quyidagi fikrlarni bildirdi:
“Sizlar bizning universitet sharafini, qolaversa, butun Jizzax viloyatining nomini munosib himoya qiluvchi elchilarsiz. Mardlik, matonat va birdamlik bilan maydonga chiqing. Har bir qadamingizda omad hamroh bo‘lsin! Biz sizlarga ishonamiz, universitet bayrog‘ini baland ko‘tarib qaytishingizga tilakdoshmiz.” Ana shunday ruhlantiruvchi so‘zlar bilan sportchilarimiz tantanali ravishda yo‘lga kuzatildi.
Ta’kidlash joiz, “Besh tashabbus olimpiadasi”ning respublika final bosqichi 17–20-noyabr kunlari Sirdaryo viloyatining Guliston shahrida, Guliston davlat universitetida o‘tkaziladi. Unda universitetimizning erkaklar va ayollardan iborat jamoalari voleybol, yengil atletika va stritbol yo‘nalishlarida ishtirok etadi.
Biz eng sportchi talabalarimizdan yaxshi natijalarni, munosib g‘alabalarni kutib qolamiz. JDPU sportchilari – g‘alaba va omad siz bilan bo‘lsin!
