Jizzax davlat pedagogika universitetida O‘zbekiston Qonunchilik palatasi deputati, “Milliy tiklanish”  rahbari Alisher Qodirov bilan talabalar uchrashuvi tashkil etildi.

Davra suhbatini kirish so‘zi bilan ochgan Qonunchilik palatasi Spikeri o‘rinbosari Alisher Qodirov ushbu Konstitutsiyaviy qonun loyihasining muhimligini e’tirof etgan holda proporsional saylov tizimining afzalliklari  Majoritar va proporsional tizimlar: farqlari, afzallik va kamchiliklari xususida so‘z yuritdi.

– Majoritar tizim shundayki, unda saylovchilar tomonidan eng ko‘p ovoz olgan nomzodlar parlamentga saylanadi. Bizda amaldagi saylov tizimi majoritar tizim hisoblanadi. Proporsional saylovda esa partiyalar va ularning g‘oyalari musobaqaga kirishadi va saylovchilar ham partiyalarga ovoz beradi. Saylovchilar partiyalarning dasturlari, targ‘ibotiga ko‘ra ovoz tanlashadi. Partiya tomonidan tanlangan nomzodlar berilgan ovozlarga qarab parlamentga yuboriladi. Saylovchi proporsional saylov tizimida o‘zi tanlagan partiyaga ovoz bergandan keyin muayyan masaladagi murojaati uchun aniq manzilga ega bo‘ladi. To‘g‘ri, deputatlar ham saylovchilar oldida hisobdor, ularning murojaatlari bilan muntazam ishlaydi. Ammo siyosiy partiyalarning imkoniyati, salohiyati katta. Joylardagi tashkilotlari orqali saylovchilar bilan yaqindan aloqada bo‘lib, ishlash imkoniga ega.

Tadbirda shuningdek ma’ruzachi mazkur qonun loyihasining bugungi kundagi ahamiyati, unda belgilanayotgan normalarning mazmun-mohiyati xususida ham to‘xtaldi. Unga ko‘ra Qonunchilik palatasining 75 nafar deputati amaldagidek majoritar tizim asosida bir mandatli saylov okruglaridan, qolgan 75 nafari esa partiya ro‘yxati bo‘yicha yangi taklif etilayotgan proporsional tizim asosida yagona saylov okrugidan saylanishi ko‘zda tutilgan. Davra suhbati so‘ngida  talaba yoshlar hamda universitet professor-o‘qituvchilari  o‘z fikr-mulohazalarini bildirish bilan bir qatorda mavzu doirasida berilgan savollarga javob olishdi.